ЗОШТО ПИВО ПРЕД КООПЕРАЦИЈА Е ЗАКОН
Наточено од
Анета Перевска Најчесто копирајтер, новинар, а 24/7 мајка и сопруга.
16 декември 2015
- Затоа што во времето пред социјалните медиуми Кооперација беше збирната точка за сите маалски (а и не толку маалски) новости, а со по едно пиво овие муабети траеја со саати, некогаш дури и додека да изгрее сонцето.
- Затоа што многу е поголем ќеифот да им кажеш на другарите дека си ја испратил до дома и си ја бакнал пред влез, правејќи групно „На здравје!“, отколку само да смениш relationship-статус на Фејсбук. Сам во соба, пред компјутер.
- Затоа што голем дел од животните филозофии беа одредувани токму на тоа добро познато магично местенце во маало – пред продавничето од кое земаш грч ладно пиво и зборуваш за сите важни работи на светот. И затоа што кога ти било тешко, за да се смириш, доволно ти било само да ја излупиш етикетата и од прва да успееш да го отвориш шишето со запалка. А потоа да ги жалиш големите филозофи што морале на потешкиот начин да го сфаќаат животот…
- Затоа што во кафуле или диско не можеш да бидеш толку опуштен, а, сепак, „во шема“. Замисли си го ова – топло летно попладне, друштвото собрано на купче, обединето со пиво, рафално растројување на некој од друштвото, многу смеа, понекогаш и понекоја скриена солза, тешење и разговори во кои сите имаат и никој нема право. Сето тоа од удобноста на превртената гајба што ти ја нарекуваш столче, а на која радо би седел со саати додека да се дообјасниш.
- Затоа што ако не си седел барем еднаш пред Кооперација, никогаш нема да ја сфатиш суштината на стиховите на некои наши култни бендови, како „Ласт Експедишн“ и нивната секогаш со драго срце цитирана „Шефе“. А најчесто делот: „Отвори, бе мајсторе, бешиката нè боли!”
- Затоа што во таа неинтимно интимна атмосфера можеш да си упатиш скриен поглед со девојката од маало што седи спроти тебе и срамежливо те чека да ѝ подадеш пивце од гајбата, а ти тоа така умешно го правиш за да ѝ ја допреш раката. А потоа одвај чекаш сите да го допијат пивото и да си одат за вие да останете сами и да ја бакнеш.
- Затоа што таму магично се претвораш во најуспешниот фудбалски стратег, па и политичар кој добил мандат да ја оправи државата. Нормално, и затоа што колку и да се испокараш поради несогласувањата за твоите стратегии, знаеш дека кај и да е, секирата ќе ја „закопате“ со шише пиво.
- И, конечно, затоа што таму секогаш можеш да го чуеш неисцрпниот „Во мое време…“ муабет од симпатичниот дедо, кој речиси неизбежно завршува со: „Ај дајте едно, ама онака, од нога. Морам да одам, ме чека бабата. Ајде, за нас!“
Мислењата изразени во овој текст се на авторот и не секогаш ги претставуваат ставовите на Пивара Скопје.
СПОДЕЛИ:
